වී කිලෝග්‍රෑම් එකක් රුපියල් 130කට මිලදී ගැනීමට ඇතැම් මෝල් හිමියන් සූදානම් වී ඇති අතර, මෙම තත්ත්වය හේතුවෙන් ඉදිරියේදී සහල් මිල ඉහළ නැංවීමට ඉඩ ඇති බව ජාතික ගොවිජන එකමුතුව වාර්තා කරයි.

රජය විසින් නියම කර ඇති වී මිල ගොවීන්ට සාධාරණ නොවන බවත්, එසේ වුවද සහල් මිල පාලනය කිරීමෙන් පාරිභෝගිකයින්ට සහනයක් ලබා දීමට ගොවි සංවිධාන රජයේ මිල නියමයට සහය දක්වා ඇති බව ජාතික ගොවිජන එකමුතුවේ සභාපති අනුරාධ තෙන්නකෝන් මහතා පැවසීය.

රජය විසින් නාඩු වී කිලෝග්‍රෑම් එකක් සඳහා නියම කර ඇති මිල රුපියල් 120ක් වුවද, සමහර මෝල් හිමියන් වී කිලෝග්‍රෑම් එකක් රුපියල් 130කට මිලදී ගන්නා බවට ප්‍රකාශ කර ඇති අතර, මෙය ඉදිරියේදී සහල් මිල ඉහළ නැංවීමට හේතු විය හැකි බව ඔහු අවධාරණය කළේය.

තෙන්නකෝන් මහතා තවදුරටත් පැවසුවේ, වර්තමානයේ සහල් සඳහා රජය විසින් නියම කර ඇති පාලන මිල පාර්ලිමේන්තුවට ඉදිරිපත් කර නීත්‍යානුකූල බවට පත් කළ යුතු බවත්, මේ වසර පුරාම දැනට පවතින සහල් මිල පවත්වා ගෙන යාමෙන් පාරිභෝගිකයින්ට සහනයක් ලබා දිය යුතු බවත්ය. එමෙන්ම, ගොවීන්ට සහන ලබා දීම සඳහා ගොවි උපකරණ මත අය කරන බදු ඉවත් කිරීමට රජය අවශ්‍ය පියවර ගත යුතු බවද ඔහු ඉල්ලා සිටියේය.

මීට අමතරව, පසුගිය දිනවල ඇති වූ අසාමාන්‍ය කාලගුණ තත්ත්වය හේතුවෙන් මෙවර කන්නයේ වී අස්වැන්න අඩු වී ඇති බවත්, එම අස්වැන්න නිසි ලෙස කළමනාකරණය කිරීම අත්‍යවශ්‍ය බවත් තෙන්නකෝන් මහතා සඳහන් කළේය.

ඔහු තවදුරටත් පැවසුවේ, මෝල් හිමියන් වී කිලෝග්‍රෑම් එකක් රුපියල් 130කට මිලදී ගත්තද, නාඩු සහල් කිලෝග්‍රෑම් එකක් රුපියල් 230කට සිල්ලර වෙළෙඳපොළට අලෙවි කිරීමට හැකිව ඇති බවයි. මෙම තත්ත්වය හේතුවෙන් ඉදිරියේදී සහල් මිල ඉහළ නැංවීමට ඇතැම් මෝල් හිමියන් සූදානම් වී සිටින බවට ඔහු අනාවරණය කළේය.

මිල නියම කිරීමේ අයිතිය රජය සතු බැවින්, මිල වෙනස් කිරීමට ඇතැම් පිරිස් උත්සාහ කළද, රජය ජනතාවගේ පැත්තෙන් සිට නිවැරදි තීරණ ගත යුතු බව තෙන්නකෝන් මහතා අවධාරණය කළේය.

අවසානයේදී, ඔහු සඳහන් කළේ, අතීතයේ සුළු වී ප්‍රමාණයක් වැඩි මිලට මිලදී ගෙන සමස්ත සහල් තොගයම වැඩි මිලට විකිණීමේ ව්‍යාපාරයක ඇතැම් මෝල් හිමියන් නිරත වූ බවත්, මෙවර කන්නයේදී මෙම තත්ත්වය නැති කිරීමට කටයුතු කළ යුතු බවත්ය.